Masobra P41 million nga balor sang suspected shabu ang narekober sa buy bust operation sa Purok Malipayon, Brgy. 35, Bacolod City, las-8:12 sang gab-i, Agosto 13, 2024.
Ginkilala ang suspek nga si Jhon Philip Dellomo alyas Tol, 28-anyos kag residente sang nasambit nga lugar. Nakuha sa suspek ang kilos sang suspected shabu. Sa interview sang DYHB sa officer in-charge sang City Drug Enforcement Unit (RDEU) nga si Police Capt. Glen Soliman, wala sang trabaho ang suspek apang may na-acquire ini nga balay. Nakuha sa suspek ang 6 kilos sang suspected shabu nga nagabalor sang P41,344,000.
Magluwas sa suspek, gindakop man ang amay ni Jhon Philip nga si Lauro, 52, kag utod sini nga si Ronel, 36, bangud naman sa obstruction of justice. Suno sa OIC, may isa ka police operative nga ulihi nakaabot sa lugar kag ini ang gin-mob sang utod kag amay sang suspek.
