Nagaplano ang Provincial Health Office nga maglibot sa mga distrito sa probinsiya sang Negros Occidental agud edukahon ang mga health workers sa pag-assess sang mga pasyente sang dengue sa ila lugar.
Ini ang ginpahayag ni Provincial Health Officer Dr. Girlie Pinongan sa tunga sang paggutok sang mga ospital sa probinsiya bangud man sang pagdamu sang mga natapikan sang dengue.
Suno kay Pinongan, may mga kaso nga indi na kinahanglan nga dal-on sa ospital kun matapna man lang ang paglala sini.
Kahapon, nagsapol ang mga chiefs-of-hospitals sang mga district hospitals sa probinsiya agud hambalan kun paano matapna ang padayon nga pagsaka sang kaso. Isa sa plano himuon amo ang pagpasanyog sang adbokasiya batok sa Dengue sa mga LGUs.
Base sa monitoring sang PHO, as of August 10, nagdangat na sa 1,777 ang dengue cases sa Negros Occidental kun sa diin anom ang nagkalamatay. Ini ang 94.21% nga mas mataas ikumparar sa recorded dengue cases sa kaangay nga period sang nagligad nga tuig.
