Ginpresentar na sang Yuhum Foundation Inc. ang pila sa mga balantayan nga aktibidad sa selebrasyon sang 45th ’Sapphire’ Masskara Festival umpisa September 29 tubtob October 27, 2024 sa ginpatigayon nga sponsor’s and press presentation sang Agosto 17.
Nagapati man si Bacolod City Mayor Albee Benitez nga mangin mas matahum ang selebrasyon sini nga tuig bangud man sa ginpahayag nga interes sang pila ka mga dalagko nga sponsors para sa Masskara Festival.
Dugang pa sang alkalde nga may pila man ka mga Senador nga nagpasalig mag-sponsor sa pila ka mga sporting events nga patigayunon.
Sini nga 2024, ila tuyo nga mas i-expand ang platform sa diin ma-showcase ang Masskara Festival kaangay na lamang sa TV kag live streaming sini Internationally.
“Bigger Masskara,” ini ang paglaragway ni Benitez sa selebrasyon sini nga tuig. Kaangay sang tinalikdan nga tuig, P11 million sa gihapon ang igahatag sang LGU sang Bacolod sa Yuhum Foundation.
Pagklaro sini nga ang nasiling nga pondo ang magadiretso na sa pagkinahanglanon sang tagsa ka mga Barangay nga magapakigbahin sa aktibidad kasubong man sa pila ka mga operating expenses.
