Personal nga gin-‘inspection’ ni Sugar Regulatory Administrator Pablo Luis Azcona ang loading sang raw sugar sa Bredco Port nga iga-export sa United States sang Sabado, August 17, 2024.
Base sa Sugar Order 3, ang Pilipinas ang ginapahanugutan nga maka-export sang 25,300 metric tons sang raw sugar sa Amerika.
Suno kay Azcona nga ang exportation sang kalamay sa US ang magabalanse naman sa supply sang raw sugar sa pungsod bangud man nga magasugod naman ang galing ukon ang milling season sa masunod nga bulan.
Paathag ni Azcona nga ang loading sang kalamay Bredco Port ang magalawig sang 15 dias sa diin 1,500 metric tons ang ginaload sa tagsa ka adlaw bangud man nga manu-mano ini nga ginapasulod sa barko.
Ginapasalamatan sang SRA ang mga traders nga nag-upod sa programa bangud apisar ila ginbakal ang kalamay nga yara sa 2,700 pesos per bag, ila naman ini ginpierdihan sang 900 tubtob 1,200 pesos per bag.
Nahibalu-an nga ang export price sang kalamay nga maga-abot sa US ang yara lang sa 1,800 pesos per bag.
Samtang, ginapasalamatan man ni Azcona ang Bacolod LGU sa diin ginhatagan sang exemption sa truck ban ang mga truck nga nagadeliver sang kalamay para naman mas mapadasig ang loading sini. Ang kalamay gikan sa Negros ang ginalauman nga makalab-ot sa US sa sulod sang 30 dias nga sea travel.
