Nagpatigayon sang prayer rally ang mga estudyante kag mga manunudlo, kag principal sang Sum-Ag National High School para kay Pearl Joy Galve, nga isa ka grade 10 student sa amo nga buluthuan.
Base sa pahayag ni Warlito Rosareal, principal sang amo nga buluthuan, nagtipon ang kapin 5,000 ka mga estudyante agod maghalad sang pagpangamuyo para sa hustisya ni Pearl Joy matapos nga ini ang nasapwan nga wala na sang kabuhi sa Hacienda San Roque Barangay Cubay sa ciudad sang La Carlota sadtong Agosto 14.
Nangin kabahin sa amo nga prayer rally ang panawagan sa mga law enforcement agency nga masolbar ang kaso ni Pearl Joy agod mahatagan sang hustisya ang kamatayon sini.
Luyag man ipalab-ot sang buluthuan ang amo nga insidente kay President Ferdinand ‘BongBong’ Marcos Jr.
Dugang pa ni Rosareal, naga-koordinar ang mga manunudlo kag mga ginikanan sang mga estudyante agod mamonitor ang mga aktibidad sang mga kabataan sa sulod sang eskwelahan kag amo man ang pagpauli nila sa ila tagsa ka mga puluy-an.
Kahapon ginlubong na si Galve sa Sum-ag Public Cemetery.
