Maga-konsulta si Mayor Javi Benitez sa iya mga plano para sa 2025 elections. Ini ang ginpaguwa nga pahayag ni Mayor Javi matapos naguwa ang mga panawagan nga ini magpadalagan kongresista sa third district sang Negros Occidental matapos gin-appoint TESDA Director General ang iya man tiyo nga si Cong. Kiko Benitez.
Dugang pa ni Mayor Javi, ang desisyon angut sa iya pagpadalagan ang iga-konsulta sa iya team kag mismo sa mga pumuluyo sang Victorias City. Dugang pa sang alkalde, siya ang maga-anunsiyo sang iya plano kag wala na sang iban nga indibidwal ang magahimo sini.
Madumduman nga sang nagligad nga adlaw, mismo ang iya amay nga si Bacolod Mayor Albee Benitez ang nagpahayag nga nagapati ini nga si Javi ang mangin mabakod nga kandidato para sa pagka-konggresista sa third district.
Sa interview kay Mayor Albee, ginpahayag sini nga nagapati siya nga kabahin sa mga plano ni Mayor Javi para sa 2025 elections amo ang magpangalagad sa ika-tatlo nga distrito sang probinsya.
Dugang pa, kinahanglan nga una anay istoryahon ang mga opisyal sang third district sa kun sin-o ang ila gusto ukon igaduso para magbulos sa pwesto nga pagabayaan ni Congressman Kiko.
