Isa ka 9-anyos nga lalaki ang nag-alegar gintuyo nga kidnapon saguwa sang isa ka eskwelahan sa ciudad sang Bacolod. Personal nga na-istorya sang DYHB News Team ang 9-anyos nga estudyante sang isa ka eskwelahan sa Brgy. Bata kag mismo ang iloy sini.
Sa pagsaysay sang 9-anyos sa DYHB News Team, naguwa ini sa eskwelahan kahapon sang udto para magbakal sang sabaw sang linaga para kuntani ini sa iya panyaga. Paguwa sini sa eskwelahan, may isa ka babayi nga nagsugata sa iya nga naghambal nga abyan ini sang iya iloy kag ginahagad siya nga mamakal sa isa ka mall.
Apang wala nag-upod ang bata kag sa kakulba sini, nagsakay ini sa traysikol pauli sa ila balay. Pagkatapos siya ginhambalan sang babayi kag wala siya nag-upod, nagsakay na lamang ini sa taxi sa unhan kag may upod nga tatlo ka lalaki nga naka-facemask.
Sa paglaragway sang bata, ang babayi nga nagpalapit sa iya ang morena, nubo ang buhok, pango ang ilong kag nakasuksok sang bayo nga may bulak-bulak. (INSERT VC PAHAYAG SANG 9-ANYOS)
Sa interview naman sang News Team sa iloy, tuman ang palangurog sini sang nahibaluan ang natabo sa iya bata. Nagapasalamat ini nga wala nag-upod ang iya anak sa babayi bangud natudluan niya ini nga indi mag-upod sa mga indi nila kilala. Matapos ang insidente, nagbalik ang iloy sa eskwelahan kag nagpahibalo sa natabo, kag gilayon naman nagpatawag sang meeting ang principal sang eskwelahan kag temprano nga ginpapauli ang mga estudyante sang hapon.
Suno pa sa iloy, wala siya sang abyan nga nagasantu sa description sang bata sa babayi nga naghagad sa iya magkadto sa mall. Gin-report na sa barangay ang insidente kag ginpa-blotter naman sa Police Station 3.
Kasunod sang insidente, nagaplano ang iloy nga idul-ong kon aga ang iya anak kag ibilin sa adviser nga indi paguwaon sa eskwelahan kon wala pa niya sugat. Hingyuon man sini sa eskwelahan nga maggamit sang gate pass sa mga nagasulod sa eskwelahan.
