Ginalantaw nga pagtimalos ang motibo sa pagbuno-patay sa isa ka 17-anyos nga soltero sa atubang mismo sang ila puluy-an sa banwa sang Hinigaran sadtong Agosto 18.
Base sa interview sang DYHB kay Police Lieutenant Colonel Eduardo Corpuz, hepe sang Hinigaran Municipal Police Station, may yara na sila sang persons of interest natuhoy sa amo nga krimen kag ila sa karun ginataod-taod kun sino ang mastermind sa pagpatay sa biktima.
Sa inisyal nga imbestigasyon sang mga kapulisan, posible may ginhire ang mastermind sa amo nga krimen sang mga persona agod magpatay sa 17-anyos.
Santo sa kopya sang CCTV footage nga nakuha, may duha ka mga persona ang nakita nga sakay sa motorsiklo sa amo nga oras sang natabo ang amo insidente kag sila ang padulong sa norte nga direksyon agod magpalagyo, kag ginabulubanta yara sa early 30’s ang mga pang-edaron sang mga ini.
Una na nga ginapahayag sang mga kapulisan nga gina-alegar nagsugod sa biktima ang paglapta sang sensitibo nga video sang lalaki kag babaye.
Kun sa diin gina-alegar, ginblack mail sang biktima ang duha ka mga persona nga yara sa video nga kun siya ang pagahatagan sang kwarta nga ₱10,000, iya iga-delete ang amo nga video.
Sa pahayag ni Lt. Col. Corpuz, sang tinalikan nga mga sinemana, ginakakibot sang iloy sang biktima nga ini ang nakabaton sang amo nga balor sang kwarta sa iya nga gcash account, apang ginbalik ini niya sa nagsend bangod sa iya paglaum nga ini ang nagtalang.
Paga-tsekyaron naman sang mga kapulisan sa National Bureau of Investigation kun may nagreport sa ila natuhoy sa amo nga video. Ginapangabay sang Hinigaran MPS sa karun, nga mag-kooperar ang pamilya sang biktima agod mahatagan sang hustisya ang 17-anyos sa nagapadayon nga imbestigasyon.
