Kun may tooth fairy nga ginapatihan ang mga kabataan kada mahukas ang ila nga unto, sa Nepal naman may ginatu-o nga “tooth-ache tree” nga ila ginakadtuan kada magsakit ang ila ngipon.
Sin-o bala ang indi mabad-trip ukon mawad-an gana mag trabaho kun nagasinakit ang imo unto? Ang feeling nga daw ang bilog nga lawas mo apektado.
Sa Nepal, indi dentista ang ila ginabisita kun magsinakit ang ila unto kundi, isa ka utod nga kahoy, ini ang ila ginatawag Vaisha Dev Shrine ang ginakabig Newar goddess of toothache.
Kaangay nga isa ka tourist attraction ang ini nga kahoy sa kalye sang Kathmandu, ang capital sang Nepal.
Agud makuha ang kasakit sa unto sang ini nga mga tawo, sila ang nagalansang sang Nepalese ruppe coins diri.
Ginabulubanta yara sa 400-750 (CE) Common Era ang nasiling nga kahoy kag naghalin pa sa Lichchhavi kingdom.
Nagapati ang ini nga mga tawo nga may imahe sang goddess sulod sang kahoy. Apang indi pa mapat-od kun visible pa ini bangud napuno na sang sinsilyo ang nasiling nga kahoy.
