Nakilala na ang duha ka mga ginapatihan rebelde nga nagtaliwan sa nagluntad nga engkwentro sa tunga sang 94th Infantry Battalion kag remnants sang New People’s Army- Central Negros 2 sa Sitio Pisok, Barangay Buenavista, Himamaylan City, pasado las-8 sang aga, Agosto 22.
Ginkilala ang mga ginapatihan nga rebelde nanday Joan Lacio Encancion alias “MARK/COVID”, lalaki, isa ka Vice Commanding Officer sang Sentro de Grabidad (SDG) Platoon, kag si Jolina Martinez Sergio alias “CHLOE/19”, Political Instructor sang SDG Platoon.
Base sa interview sang DYHB kay Brigadier General Orlando Edralin, Commanding Officer sang 303rd Infantry Brigade, nagluntad ang engkwentro bangod sa mga impormasyon nagikan sa mga pumuluyo nga nagapang-extort ang amo nga mga rebelde sa lugar.
Nagdugay ang amo nga engkwentro sang kapin lima ka minuto sa ginabulubanta kapin lima man ka mga katapo sang rebelde.
Narekober sa encounter site ang isa ka M16 rifle, isa ka M14 rifle, isa ka magazine sang M14, magazine sang long M16, isa magazine short M16, live ammunition, kag iban pa nga mga kagamitan.Wala naman sang may nasamaran sa bahin sang 94th Infantry Battalion. Padayon ang hot pursuit operation sang mga katapo sang militar.
