Halos indi pa maistorya kag wala gana magkaon ang kolehiyala nga gin-alegar gin-abduct sa ciudad sang Bacolod kag nakapalagyo sa ciudad sang Bago.
Sa interview sang DYHB News Team sa iloy sang kolehiyala sa ila nga balay sa banwa sang Binalbagan, nagapasalamat ini nga nakapalagyo kag buhi ang iya nga anak. Suno pa sa iloy wala sang kontra ang iya anak nga posible magahimo sa iya sang natabo. Wala na ginpaatubang sang iloy sa News Team ang iya anak bangud halos indi pa maistorya, wala nagakaon kag wala man gana nga magbalik sa eskwelahan.
Santo sa pagpangusisa sang Bacolod PS4, nagikan ang biktima sa iya nga boarding house sa Brgy. Villamonte kag magabakal kuntani sang sud-an apang hinali may nagpwersa sa iya nga apat ka mga wala makilal-an nga persona nga magsakay sa salakyan, kapin las-8 sang gab-i, Agosto 21.
Natigayon nga nakapalagyo ang biktima bangod sa bahin sang Barangay Sampinit ciudad sang Bago, pasado las-10 sang gab-i, sa amo nga adlaw, nagpundo ang van bangod ang mga persona nga nagkuha sa iya ang nagpanigarilyo kag nagpangihi.
Gina-alegar nagdali-dali palagyo ang biktima kag nanago sa kampo kag siya ang nakita sang mga pumuluyo sa lugar samtang sila ang nagapanguha sang damang, kag natigayon ini nga ma-rescue. Nakita ang biktima nga may higot sa iya liog kag mga kamot. Ang biktima ang may tatlo ka pilas sa liog bangud sang gintaya nga kutsilyo.
