May close coordination ang city government sang Bacolod sa Negros Electric Power Corporation (NEPC) agud ma-address ang nagapadayon nga brownout sa pila ka lugar sa ciudad nga nagaapekto na sa kabuhi kag kabuhian sang mga kunsumidor. Sa statement ni Mayor Albee Benitez nga ginpaagi sa iya spokesperson, Atty. Caesar Distrito, nakig-angot na ini sa NEPC officials kag ang korporasyon ang nagpasalig nga mahatagan solusyon ang mga problema nga ila ginsalo gikan sa previous operator nga CENECO. Ginpasalig naman sang NEPC nga maga-abot subong nga adlaw ang 10 MVA mobile substation gikan sa ila sister company nga MORE Power Iloilo kag ini ang magahatag sang dugang nga elektrisidad matapos naguba ang Alijis substation. Sa karon ang Alijis substation ang nakakonekta sa mga kaingod sini nga substations paagi sa feeder lines agud makahatag sang dugang nga power supply. Ginaproseso naman karon sang NEPC ang pag-install sang bag-o nga 18 MVA power transformer agud islan ang naguba nga Alijis substation kag ini ang ginalauman nga matapos sa sulod sang duha ka semana. Ginmanduan naman ni Mayor Benitez ang NEPC nga mag-submit sang transition plan kag timeline sa Sangguniang Panlungsod para sa transparency kag progress monitoring. Samtang nag-request naman si Benitez sa PRIMEWATER nga mag-deploy sang generators sa mga pumping stations kag mag-coodinate sa ila mga partners agud magpatigayon sang water rationing saa mga apektado nga lugar. Sa mga lugar nga wala sang tubig bangud sang power outage, mahimo nga mag-coordinate ang mga residente sa ila nga barangay kapitan agud makadihon sang water distribution.
