Liwat nga naaberya ang Weesam 6 fast craft sa tunga sang lawod nagikan sa BREDCO port sa ciudad sang Bacolod padulong Iloilo, las-7 sang aga, Agosto 23. Ang amo nga barko ang na-aberya man sang tinalikdan nga Nobyembre 2023 bangod sa metal fatigue kun sa diin nagkaproblema sa makina kag napatay sa tunga sang lawod samtang sakay ang 172 ka mga pasahero. Base sa pahayag ni Commander Jansen Benjamin sang Philippine Coast Guard- Negros Occidental, ang sini nga aberya sang amo nga barko bangod sang pagkaguba sang timon sini amo nga ini ang ginguyod balik sa BREDCO port. Sa karun subject for inspection kag investigation pa ang amo nga barko. Dugang pa ni Benjamin, ginsiguro man nga may certificate ang mga barko nagikan sa Maritime Industry Authority (MARINA) antes mag biyahe.
