Nagpahamtang sang mga generator sets ang Negros Power sa mga pumping stations sang Bacolod City Water District (BACIWA) agud mahagan-hagan ang mga kabudlayan sang mga konsumidor nga naapektuhan sang kakulang sang power supply gikan sa Alijis Substation. Ang amo nga mga pumping stations nga nagaangot sa Alijis Feeder 3 ang wala sang power generator sets nga kinahanglanon agud masustenir ang suplay sang tubig sa tion sang rotational brownouts. As of August 24, ang 10 MegaVolt Amperes (MVA) Mobile substation kag ang bag-o nga 18MVA nga power transformer ang nainstolar na sa compound sang Alijis substation. Nagapatigayon na sang nagakaigo nga pagpanghanda subong man electrical testing kag connection gikan sa 69KV transmission line sang NGCP kag sa 3-phase automatic circuit reclosers sa Alijis Feeder 3 kag iban pa nga mga feeders. Ginalauman nga matapos ini sa Lunes sang gab-i kag ang gina-require nga power load ang iga-supplu agud ma-energize ang tanan nga mga konsumidores sang Alijis substation agud indi na kinahanglanon ang rotational brownouts. Nahibaluan nga tuman ka importante sang Alijis substation kag ini ang nalakip sa mga substations nga igapaidalom sa rehabilitasyon sa idalom sang 5-year rehabilitation plan sang Negros Power. Ang paglupok sang 13-anyos na nga power transformer sang tinalikdan nga Agosto 21 ang nagduso sang temprano nga pag-rehabilitate sini magluwas pa sa anom ka iban pa nga substations sadto sang CENECO nga nagalapaw naman sa standard threshold ukon nagalab-ot na sang critical operational levels.
