Gindagdagan sang Office of the Ombudsman Visayas sang tatlo ka bulan nga suspension nga wala sang sweldo ang punong barangay, kagawad kag treasurer sang Brgy. 7, Bacolod City. Ini kasunod sang reklamo nga ginpasaka sang complainant nga si Cresenciano Torres batok kanday Punong Barangay Hercy Sibug, bana sini kag Kagawad nga si Bernabe Sibug kag Treasurer nga si Edmar Base.
Ang tatlo ka mga barangay officials ang napamatud-an sang Ombudsman nga liable sang Simple Misconduct. Nag-ugat ang reklamo ni Torres batok sa tatlo, sang nag-utang ang mga ini sang 2019 sang P140,000 para i-sweldo sa ila nga kagawad, barangay personnel lakip na ang ila mga tanod kag barangay health workers.
Suno sa reklamo, nagpasalig ang mga respondents nga bayaran ang utang matapos ang isa ka bulan. Apang pagkatapos sang isa ka bulan, wala nabayaran ang utang rason nga nagdemand na si Torres nga siya ang bayaran.
Sang Enero 15, 2020, naghatag sang cheke ang mga respondents bilang bayad kay Cresenciano. Ang nasambit nga cheke ang nakapangalan sa Land Bank of the Philippines kag pirmado ni Bernabe nga amo sadto ang punong barangay kag sang treasurer nga si Base. Sang ginpa-deposito ni Cresenciano sa iya account sa Queenbank ang nasambit nga cheke, wala ini gin-honor sang nasambit nga bangko sa rason nga “no advice on file”.
