Patay ang isa ka lalaki matapos makabunggo sa sementado nga poste sa Barangay Lantad ciudad sang Silay las 3:41 sang aga, Setyembre 5, 2024.
Ginkilala ang biktima nga si Jason Letran, 33-anyos residente sang Hacienda Estado, Brgy. 10, ciudad sang Victorias.
Base sa imbestigasyon sang kapulisan, nadulaan sang kontrol ang drayber, rason kun ngaa nakabunggo ang topdown nga tricycle sa sementado nga poste sa higad sang dalan.
Padulong kuntani sa merkado sang Silay ang tricycle nga ginamaneho ni Christopher Raquinel, 33-anyos, upod ang tatlo ka pasahero lakip na si Letran.
Ang mga pasahero ang lunsay residente sang Sitio Pasil, Brgy. VI-A, Victorias.
Si Letran ang nagapungko sa unahan sang tricycle kag nakabunggo ang iya sini ulo sa poste.
Gilayon man nga gindala si Letran sa Teresita L. Jalandoni Provincial Hospital apang gindeklarar ini nga dead-on-arrival.
Pilason naman sa karon ang driver sang tricycle kag ang duwa pa sini ka mga pasahero.
