Nagapabilin gihapon sa covered court sang Bgry. 4 ang 106 ka mga pamilya nga apektado sa nagluntad nga sunog sa Brgy. 5, ciudad sang San Carlos, tinalikdan nga Setyembre 6.

Sa report sang City Social Welfare and Development (CSWD) sang ciudad sang San Carlos, kapin 318 ka mga indibidwal ang narehistro bilang internally displaced persons (IDPs) nga nagapabilin sa covered court sang Brgy. 4.

Madumduman nga una na ginpahayag ni San Carlos Mayor Rene Gustilo nga magapatigayon ini sang pagsinapol subong nga adlaw, Setyembre 9, kaupod ang mga katapo sang CSWD agud i-evaluate kun pila ang sarang mahatag nga financial assistance sa tagsa ka panimalay nga apektado.

Samtang padayon pa ang imbestigasyon sang mga katapo sang Bureau of Fire Protection sang San Carlos City kun ano ang gintunaan sang sunog nga naglab-ot sa P750,000 pesos nga kahalitan sa 106 ka mga puluy-an. Una na nga ginpahayag ni Mayor Gustilo nga isa ka lalaki ang nagsungka sa ila kag nag-ako nga nagsugod ang kalayo sa kandila nga napabay-an nga ila gingamit sa pagsuyop sang iligal nga droga.

Share this news

Leave a Reply

Your email address will not be published. Required fields are marked *