Anum ka mga indibidwal ang magapapili sa patigayunon nga Convention sang Team Asenso sa ciudad sang Bacolod sa maabot nga Domingo, September 15, 2024. Ini ginkumpirma ni Punong Barangay Joemarie Biasca sang Barangay 36 nga nagserbe bilang Chairman sang Election Committee.
Suno kay Biasca ang nag file sang ila COC amo sanday former councilor Homer Bais, Brgy. 26 Punong Barangay Jhun Marby Orola, Rico Ferdinand Villafuerte, Brgy. 40 Punong Barangay Elmer Villanueva, Brgy. 34 Punong Barangay Teodoro Yulo kag Brgy. Vista Alegre Punong Barangay Jose Maria Leandro Norberto De Leon.
Nahibalu-an nga si Villafuerte ang pila man ka beses nagpadalagan bilang konsehal sang ciudad. May ara sang kapin 27,000 ka mga family leaders ang magaboto sa palaabuton nga convention.
Madumduman nga ang nasambit nga convention ang bahin sang plano ni Bacolod City Mayor Albee Benitez angut sa pagpili sang duha ka mga persona nga magakumpleto sa 12 ka line up sang Team Asenso bilang konsehal sang ciudad.
Una na ginpayahag ni Benitez nga napulo karon ka incumbent councilors ang kabahin na sang line up sang Team Asenso sa 2025 elections.
