Nakahanda na ang Barangay Biak na Bato sa banwa sang La Castellana sa possible nga paglupok liwat sang Bulkan Kanlaon. Sa interview sang DYHB kay Barangay Biak na Bato Punong Barangay Joselito Martinez, iya ginpahayag nga napahibalo na sini ang members sang ila council kag nag koordinar naman ini sa DRRMO sang banwa. Suno kay Martinez nga nakahanda naman ang eskwelahan nga ginakabig evacuation center kag nag koordinar naman ini sa committee on transportation nga kinahanglanon sa tion sang pag-evacuate. Padayun man ang pagpaandam sang Punong Barangay sa mga pumuluyo ilabi na ang panimalay nga yara malapit sa bulkan nga magtinir sa idalum nga bahin sang barangay sa tion sang kagab-ihon agud madasig ang rescue kag pag-evacuate. Dugang pa sini nga padayun man ang iya pag-istorya sa mga pumuluyo kag ginapabaskog ang bahin sang komunikasyon para madasig ang pag-responde sa tion magalupok liwat ang bulkan. Ginkumpirma man ni Martinez nga may ara na sang supply sang tubig apang ini ang ginadumilian nga imnon samtang naghatag naman ang LGU sang La Castellana sang tangke nga magaserbe bilang drinking water sang mga pumuluyo. Madumduman nga ang Barangay Biak na Bato ang isa sa mga nangin apektado sa paglupok sang Bulkan Kanlaon tinalikdan nga Hunyo 3, 2024.
