Suspendido ang klase sa pila ka mga local government units (LGU) sa palibot sang Mount Kanlaon subong nga adlaw sang Mierkoles, Setyembre 11, 2024 bangud sang nagasaka nga volcanic-tectonic earthquakes kag gas emission sang bulkan. Si Mayor Alme Rhummyla G. Nicor-Manguilimutan sang La Castellana, Negros Occidental ang nagdeklarar sang extension sang suspension sang klase sa banwa sini nga Mierkoles. Madumduman nga kahapon sang hapon, ginsuspend man ang klase sa banwa. Si Mayor Rex Jalando-on naman sang La Carlota City, Negros Occidental ang nag-suspend sang klase sa tanan nga eskwelahan nga nahamtang sa Brgy. Ara-al, Brgy. Haguimit, Brgy. San Miguel kag Brgy. Yubo bangud man sang aktibidad sang bulkan. Samtang, suspendido man ang klase sa ciudad sang Canlaon, probinsiya sang Negros Oriental sini nga adlaw sang Mierkoles. Santo sa Executive Order No. 65 series of 2024 nga pirmado ni Mayor Jose Chubasco Cardenas, suspendido ang klase halin pre-school tubtob college, public and private schools sini nga Setyembre 11, until further notice. Ginmanduan man sang alkalde ang mga school administrators nga i-prioritize ang safety sang ila mga pasilidad kag magpreparar sa emerhensiya.
