Handa mag-atubang sa Kongreso si Silay City Mayor Joedith Gallego kon kinahanglanon agud sabton ang mga akusasyon sa iya ni Abang Lingkod Partylist Representative Stephen Paduano.
Sa press conference kahapon ni Mayor Gallego, ginakabig sini nga political demolition ang akusasyon ni Paduano nga nagaserbe man karon caretaker sang 3rd District sa Negros Occidental natuhoy sa gina-alegar kurapsiyon.
Ginpahayag ni Gallego nga ‘trial by publicity’ ang ginpagwa nga mga anomaliya sa idalom sang iya nga administrasyon ilabi na sa tatlo ka mga proyekto nagikan sa ₱1.1 billion pesos nga balor sang loan.
Nahibaluan nga ang amo nga loan ang para sa rehabilitasyon kag pagtukod sang City Hall, City College, kag Public Market. Nagapanindugan ang alkalde nga nag-agi tanan sa insakto kag husto nga proseso ang mga proyekto sa idalom sang iya nga administrasyon.
Nagapati si Gallego nga wala na sang iban nga tuyo ang amo nga aksusasyon kundi pagpang-guba sa iya bangod sa nagahilapit nga filing sang Certificate of Candidacy (COC) para sa Midterm Election. Madumduman, sadtong Setyembre 9, nagpahayag sang privilege speech si Paduano sa Kongreso kag iya ginsiling ang gin-alegar nga kurapsiyon sa cuidad sang Silay nahanungod sa mga proyekto.
