Patay ang duha ka mga lalaki sa separado nga gina-alegr shooting incidents sa Bacolod kahapon. Una diri, patay ang wala pa makilal-an nga lalaki matapos gina-alegar gintiro sa Purok Simborio, Hacienda Gensoli, Brgy. Vista Alegre ciudad sang Bacolod las-2 kahapon sang hapon, Setyembre 12, 2024.
Basi sa inisyal nga impormasyon sang mga kapulisan nagasakay ang biktima sa single nga motorsiklo sang ini ang naka-angkon sang pilas sa iya ulo.
Sa interview sang DYHB kay Police Station 7 Commander Captain Dax Santillan, iya ginpahayag nga posible nga nadagdag lamang ang biktima ukon ginlampusan nga gintunaan sang iya head injury. Wala man ginkumpirma sang station commander nga may shooting incident nga natabo. Apang sa pag-usisa sang DYHB sa mga residente malapit sa crime scene may nabatian ang mga ini nga linupok.
Suno kay Santillan nga santol lamang ang unod sang bag sang biktima kag wala ini sang mga ID ukon ano man nga sahi sang iya identification.
Samtang, patay man ang isa ka lalaki matapos ginluthang sa Zone 1, Barangay Bata ciudad sang Bacolod las-5 sang hapon, Setyembre 12, 2024.
Ginkilala ang biktima nga si Mark Robert Sison, 38 anyos kag residente sang nasambit ga lugar.
Sa inisyal nga impormasyon, nagapungko si Sison sa sidecar nga motorsiklo sang hinali ginluthang ini sang wala pa makilal-an nga persona. Ginalantaw naman sang mga kapulisan ang motibo sang krimen kun angut ini sa droga ukon personal. Padayun sa karon ang imbestigasyon sang mga katapo sang Police Station 3 natuhoy sa insidente.
