Nagdangat na sa masobra 400 ka mga indibidwal ang nag-evacuate sa Canlaon City, Negros Oriental sa tunga sang pagtaas sang aktibidad sang Mt. Kanlaon, base sa ulihi nga rekord, Setyembre 12.
Base sa interview sang DYHB kay Mayor Jose Chubasco Cardenas, alkalde sang amo nga ciudad, may tatlo ka pamilya ukon 13 ka mga indibidwal ang nag-evacuate nagikan sa Brgy. Pula, 89 ka pamilya ukon 254 indibidwal sa Brgy. Masulog, 49 ka mga pamilya ukon 141 ka indibidwal sa Brgy. Malaiba, kag apat ka pamilya ukon 15 ka indibidwal ang nagikan sa Brgy. Lumapao.
Nahamtang sa karun sa tagsa ka mga covered court kag malapit nga buluthuan ang mga evacuees nagikan sa amo nga Barangay sa Canlaon City. Wala may makita nga eruption, apang nabatyagan nila sa ila mga mata nga nagasakit bangod sa presensya sang sulfur,
Sa karun, ginatutukan sa ciudad ang disaster preparedness and readiness, kag quick reaction para sa mas madasig nga pag transport sang mga pumuluyo padulong sa evacuation center.
Nag issue man sang executive order for force evacuation ang alkalde sadtong Setyembre 11, apang sa tunga sina ang mga pumuluyo ang nag boluntaryo na padulong sa evacuation center, indi kaangay sang tinalikan nga Hunyo nga pagluntad sang phreatic eruption nga piliton pa sila nga mag-evacuate.
Nagpahamtang man sang apat ka mga light vehicles ang ciudad sa kada barangay para mag-evacuate ang mga pumuluyo sang mas madasig. Preparado naman ang ciudad sa mga kinahanglanon sang mga pumuluyo pinaagi sa pagbulig sang mga nagkalain-lain nga sektor sang gobyerno.
Naganawagan si Cardenas sa publiko nga magpangamuyo nga magkalma na ang bulkan, siguradohon ang mga panugyan nga tumanon, indi magpati sa mga peke nga impormasyon, mangin alerto sa mga announcement kag instructions para sa mas mahapos nga pagpatigayon sang evacuation.
