Ginkalipay sang isa sa mga biktima nga nabudol sang ₱750,000 nga nadakpan na ang mga suspetsado sa joint entrapment operation sang Bacolod City Police Station 8 kag Bacolod City Investigation and Detection Management Unit, Martes sang hapon, Setyembre 17.
Base sa pahayag sang biktima, sadtong tuig 2023 sang siya ang nagbaligya sang iya nga balay, kag nag-contact ang suspetsado sa iya kag nagpakilala nga buyer. Ginpanagupnopan pa sang biktima sadto nga budol ang naga-contact sa iya natuhoy sa pagbakal sang balay bangod wala ini ihibalo kun paano nakuha ang numero niya. Naka-transaksiyon sang biktima ang pito ka mga suspetsado apang isa-isa ini sila nga nagapadulong sa iya sa plano nga pagabaklon ang balay.
Apang, nag-abot ang adlaw nga siya ang ginbilinan sang isa sa mga suspetsado sang apat ka box unod ang ginapatihan artificial insemination para sa baka kag ginpangayuan sang kapin ₱4,000,000 apang iya lamang ginhatag ang balor nga ₱750,000 sa baylo nga pagabaklon na ang ginabaligya nga balay sang isa man ka nagpakilala nga buyer sang amo nga balay kag sang box nga ginbilin sa iya.
Isa man sa rason nga nagpagwa sang kwarta ang biktima bangod nga may ginansiya siya nga ₱3,000 sa isa ka box nga ginhatag lamang sa iya sa balor nga ₱22,000 nga dapat ibaligya sa balor nga ₱25,000. Naglaom ang biktima nga sa amo nga adlaw, mabakal na ang ginabaligya nga balay apang wala na nakapadulong sa iya ang gina-patihan buyer.
Sa pagbukas sang biktima sang box, imbis nga artificial insemination ang unod sang box, ini ang may unod nga tayubong. Gilayon naman nga nagpa-blotter kag nag-file sang kaso nga estafa ang biktima batok sa mga suspetsado.
Dugang pa sang biktima, iya ginkalipay nga natigayon nga ma-aresto ang mga suspetsado sang mga katapo sang kapulisan kun sa diin isa sa iya mga abyan ang mangin target kuntani sang mga ini sa kaangay nga budol.
