BACOLOD CITY- Pagapasakaan sang kaso ang anom ka mga katapo sang traditional public utility jeepney matapos ang tensyon nga nagluntad sa tunga sang rally protesta sa atubang sang isa ka hotel sa bahin sang dalan Lacson, pasado las-11, Miyerkules, Setyembre 18.
Gin-aresto sang mga kapulisan amo nanday Rudy Cathedral, presidente sang BACOD-Manibela; Lillian Sembrano, presidente sang KNETCO-Piston;Rodolfo Gardose, presidente sang UNDOC Piston; Eric Bendoy, Secretary General sang UNDOC-Piston; Melchor Omagayon kag Shalemar Saliot nga miyembro sang amo nga transport group.
Base sa pahayag ni Police Colonel Joeresty Coronica, Bacolod City Police Office Director, nga bukas sa ila nga magpatigayon sang rally protesta ang mga drivers kag operators sang traditional PUJ, apang ini ang may limitasyon kag yara dapat sa tama nga panahon kag lugar.
Antes pa man magpatigayon sang pwersa nga pagpahalin ang mga kapulisan sa amo nga grupo, naghatag pa sang abiso ang mga otoridad sa mga ini.
Posible nga magapangatubang sang kaso ang amo nga mga persona sa paglapas sang Batas Pambansa Bilang 880 bangod wala ini sila sang nagakaigo nga permit agod magpatigayon sang rally protesta sa lugar nga indi makabig nga freedom park, resistance to person in authority, paglapas sa Republic Act 4136 ukon pag-obstruct sa dalan Lacson kag paglapas traffic safety sang publiko, kag physical injury bangod naagom sang pilas ang duha ka mga katapo sang kapulisan bangod sa paghaboy bato sang pila ka mga miyembro sang amo nga grupo.
Nagapati si Coronica nga preparado ang grupo sa tensyon nga magaluntad bangod may mga dala ang mga ini sang bato. Nahunong sa karun sa Bacolod City Police Station 2 ang amo nga mga persona para sa nagakaigo nga disposisyon. Samtang, antes pa man ang kaso, nag-file na ang kampo sang anom ka mga transport leaders sang writ of habeas corpus sa Hall of Justice kahapon.
Suno sa legal counsel sang grupo nga si Atty. Rey Gorgonio, nagtupa sa Regional Trial Court (RTC) Branch 50 ang petition nga ginpangunahan ni former congressman Pete Pico. Las-8 sini nga aga, may gintalana nga hearing ang korte para sa petisyon.
