Napanimahuan ang tuman ka baho sang asupre sa banwa sang La Castellana kag kaiping nga lugar, kahapon nga adlaw sang Martes, Setyembre 24.
Base sa pahayag ni John De Asis, La Castellana Municipal Disaster Risk Reduction and Management Officer Head, napanimahuan ang asupre sa banwa tungang udto tubtob kapin las-3 sang hapon.
Napanimahuan ang asupre sa banwa bangod sa direksyon sang hangin padulong southwest portion kag pag-ulan nga na-eksperensiyahan sa lugar.
Nahibaluan nga sang tinalikdan nga mga sinemana, wala na panimahuan ang asupre sa banwa bangod ang direksyon sang hangin padulong sa bahin sang Canlaon City, Negros Oriental.
Santo sa report nga nabaton sang MDRRMO sa pila ka mga manunudlo sang Brgy. Masulog kag Mansalanao, yara sa ‘strong sulfur smell’ ang lebel sang baho ka asupre, samtang sa proper sang banwa naman napanimahuan sa ‘mild to moderate’ ang asupre.
Nagapanawagan ang MDRRMO nga magsuksok sang facemask ang mga pumuluyo sa banwa, ilabi na ang mga may masakit sa baga kag mahina ang immune system kaangay sang mga kabataan, katigulangan, kag Person With Disabilities (PWD).
Dugang pa ni De Asis, gina-engganyo man ang mga pumuluyo malapit sa bulkan nga siraduhan ang bintana kag pwertahan sang ila balay agod indi makasulod ang baho.
Samtang, yara na lamang sa kapin napulo ka pamilya ang nabilin nga evacuees nga nagikan sa Brgy. Masulog matapos nga nagpatigayon sang pre-emptive evacuation ang banwa sang tinalikdan nga semana.
