Nagdangat sa kapin 492 ka mga indibidwal ang nagtaliwan matapos ang pagpatigayon sang Israel sang air strike nga nag-target sa mga Hezbollah sa pungsod Lebanon.
Linibo man ka mga pamilya ang naghalin sa ila mga puluy-an bangud ginpahayag sang militar sang Israel nga naigo sini ang 1,600 ka mga target sang Hezbollah sa isa ka operasyon agud gub-on ang imprastraktura nga gintukod sang armado nga grupo sumugod pa sadtong tuig 2006 nga kinagamo.
Suno sa health ministry sang Lebanon, 35 ka mga kabataan kag 58 ka mga kababaenhan ang nalakip sa mga nagtaliwan, samtang 1,645 ka mga indibidwal ang nasamaran.
Naglunsar man sang masobra 200 ka mga rocket ang Hezbollah sa Norte nga bahin sang Israel.
Ginka-alarma ni UN Secretary General António Guterres ang nagasaka nga tensyon sa lugar kag indi sini luyag nga mangin kaangay sang Gaza ang Lebanon.
