Dismayado ang pila ka mga pumuluyo nga magaparehistro kuntani sa ulihi nga adlaw sang voters registration sang Commission on Election (COMELEC) sa ciudad sang Bacolod kahapon nga adlaw Setyembre 30, 2024.
Sa interview sang DYHB kay alyas Katarina isa sa mga magaparehistro, iya ginpahayag nga 500 lang ang ginabaton sang Comelec kag nangin dismayado ini bangud madamo ang botante ang ciudad.
Suno kay Katarina nga kun ang isa ka persona ang wala sang numero apang may kakilala sa mga personnel sang Comelec, gina-alegar ini gihapon ang sarang mabaton kag makaparehistro.
Dugang pa sini nga wala na-anticipate ukon nalauman sang Comelec ang ulihi nga adlaw sang registration bangud nagapati ini nga sa last day pa magadamo ang magaparehistro bilang parte ini sang pagka-pinoy nga pamatasan.
Ginpahayag man ni alyas Katarina nga nagpatigayon kuntani ang Comelec sang mga satellite registration sa mga malls sa ciudad sang Bacolod agud ma-akomodar ang kadamuon nga magaparehistro sa katapusan nga adlaw sang voters registration. Madumduman nga nagsugod ang registration sang Comelec tinalikdan nga Pebrero 12, 2024.
