Posible nga magakontrahanay si Mayor Albee Benitez kag former Mayor Bing Leonardia sa pagka-Congressman sang Bacolod sa 2025 elections. Ini matapos gin-anunsyo kagab-i ni Leonardia nga magapapili ini bilang congressman sa ciudad sa 2025 midterm election sa idalum sang Nacionalista Party (NP).
Sa interview sang DYHB kay Leonardia, iya ginpahayag nga maga-file siya sang iya Certificate of Candidacy (COC) kaupod ang iya pamilya subong nga adlaw pagkatapos sang Misa nga patigayunon sa San Sebastian Cathedral, las-2 sang hapon, Oktubre 1, 2024.
Suno sa anay mayor sang Bacolod nga nagligad pa man, madamo sang nag-ganyat sa iya nga magpapili liwat bilang mayor kag madamo man ang nagasiling nga magpapili ini sa pagka-congressman. Nagapati si Leonardia nga napamatud-an na sini ang iya serbisyo sa Bacolodon kag ang iya rekord ang makasiling sang iya tampad nga pag-alagad sa ciudad gani tion na para magkadto sa next level sa bahin sang politika.
Ginpabugal man ni Former Mayor Bing ang pila sa mga nakuha nga mga pagkilala sa ciudad bilang most friendly city, most competitive kag most performing Local Government Unit (LGU) sa Western Visayas sang iya termino.
Magasuksok naman sang color green si Leonardia bangud suno sa anay alkalde nga green ang matuod nga duag sang Bacolod kag ini ang nangin una sini color sa pagsugod sa politika.
Dugang pa nga apisar green ang pagasuksukon sini nga color, sarang gihapon makasuksok sang pula nga duag ang iya mga supporters. (INSERT VC FORMER MAYOR BING LEONARDIA ON FILING COC)
Samtang kagab-i man, gin-anunsyo ni Atty. Ceasar Distrito spokesperson ni Bacolod City Mayor Albee Benitez nga 90% sure ang alkalde nga magapapili ini bilang Congressman sa 2025 midterm election. Sa interview sang DYHB kay Distrito iya ginpahayag nga maga-file ang Team Asenso sang COC sa maabot nga Oktubre 8, 2024. Suno sa anay konsehal nga “same team, same personality but different positions” ang matabo sa pag-file sang COC sang partido.
Ginklaro man ni Distrito nga pananglitan si Benitez ang magapadalagan bilang congressman, si Incumbent Congressman Greg Gasataya naman ang magapapili bilang alkalde. Apang ang opisyal nga announcement ang ginatugyan kay Benitez sa iya nga pagbalik sa ciudad.
Madumduman nga nag-byahe si Mayor Albee kaupod si Vice Mayor Elcid Familiarian sa pungsod Italy kaupod ang iban pa nga mga konsehal tinalikdan nga Setyembre 22, 2024. Samtang nagapabilin naman nga Acting Mayor si Councilor Thaddy Sayson tubtob sa ginalauman nga pagbalik sang alkalde sa Oktubre 2.
Kon madayon si Benitez magpadalagan congressman, ini na ang mangin rematch sa tunga nila ni Leonardia matapos nga sila ang nagkontrahanay man sa pagka-alkalde sang Bacolod tinalikdan nga 2022 local election.
