Napilian bilang tagpamuno sang Coast Guard District Southern Visayas si Commodore Ludovico Librilla matapos nga liwat nga gin-reactivate sang Philippine Coast Guard kadungan sa preparasyon para sa Negros Island Region.
Base sa pahayag ni Commo Librilla, dako ang iya pagpasalamat nga siya ang napilian nga magpamuno sa amo nga district.
Nalakip sa plano ni Librilla nga magpahamtang sang dugang nga PCG- Substation agod mas madasig ang pagresponde sang mga personnel sa tion sang emerhensiya kag sa mga lugar nga apektado sang pagbaha.
Isa man sa pagatutukan sa karun sang Southern District kun sa diin igapahamtang ang opisina, apang temporaryo sila ang igapahamtang sa Dumaguete City, Negros Oriental. Sa inisyal nga paghinun-anon kag pag-tsekyar sa tagsa ka mga lugar sa probinsya, isa sa ila ginalantaw nga pagatukuran sang opisina amo ang Kabankalan City.
Dugang pa ni Librilla, iya man pagatuktukan ang tagsa ka mga personnel sang Coast Guard nga nasakupan, natuhoy sa ila mga trainings kag deployment. Nahibaluan yara sa kapin 300 ka mga coast guard personnel ang sa idalom sang amo nga district kag padayon ang ginapatigayon nga recruitment para dugang nga manpower.
