Ginahulat karon ang liquidation report gikan sa City Treasurer’s office sa ciudad sang Sagay matapos nakita nga wala sang unod sang ginbuksan ang ila vault sang Oktubre 4, 2024.
Ginpahayag ni Sagay City Administrator Atty. Ryan Bonghanoy nga nangin witness sa pagbukas sang vault sanday Sagay City Mayor Narciso Javelosa Jr., Legal officer, City Treasurer Juvy Pinongan kag representante nga nagikan sa Commission on Audit (COA). Suno kay Atty. Bonghanoy nga antis pa man ang natalana nga pagbukas sang vault, nakabaton na sang demand letter ang City Treasurer nga mag submit sang liquidation report sa sulod sang 30 days angut sa 22 milyon nga budget kun sa diin nalakip diri ang 7.3 milyon nga ginapatihan yara sa sulod sang vault.
Dugang pa ni Bonghanoy nga may yara sang criminal liability sa COA ang tresurera pananglitan indi sini ma-submit ang liquidation nga ginademand.
Madumduman, wala mabuksan ni Pinongan ang vault bangod iya nalipatan ang combination sini, amo nga ginsilyuhan sang alkalde ang vault agod wala sang may makatandog sini mintras indi ini mabuksan sang tresurera. Nagapabilin naman nga on-duty si Pinongan bangud wala pa sang order nga nagikan sa Bureau of Local Government Finance (BLGF) angut sa replacement sang City Treasurer.
