Lima ang mga aspirants sa pagka-gobernador sang Negros Occidental sa 2025 elections.
Madumduman nga sadtong Oktubre 2, pinakauna ga nagpasa sang kandidatura sa pagka-gobernador si Ferdenand Diego alias Bongbong Gorilla sang Candoni. Oktubre 3 naman sang nag-file sang COC si incumbent Governor Eugenio Jose Lacson para sa ikatatlo sini nga termino. Samtang, Oktubre 4 sang nag-file si Architect Jonathan Paul Octaviano sang Victorias City.
Kahapon nga adlaw, nag-file sang COC ang madugay na nga ginabati-bati nga magabunggo kay Governor Lacson nga si anay Victorias City Mayor Francis Frederick Palanca sang PDP-Laban.
Nagsumiter man sang COC ang negosyante nga si Ernesto Librando sang Calatrava paagi sa authorized representative kag business partner sini nga si Anastacio Mambua.
Independent candidate si Diego, katapo naman sang Nationalist People’s Coalition si Governor Lacson samtang myembro sang Partido Lakas ng Masa si Octaviano. Si Palanca ang pambato sang PDP samtang myembro sang Partido Maharlika si Librando.
Duha man ang nag-file sang COC sa pagka-bise-gobernador – ang runningmate ni Lacson nga si Fourth District Board Member Jose Benito Alonso kag ang kapartido ni Octaviano nga si Rosemarie Jaro Dreyfus sang Silay City.
