Maga-split ukon matunga ang mga katapo sang Nationalist People’s Coalition (NPC) sa Fourth District sang Negros Occidental sa pagasuportahan nga congressional candidate para sa 2025 midterm elections.
Ginpahayag ni Governor Eugenio Jose Lacson nga ang mga NPC members nga katapo man sang local alliance sang Love Negros kag United Negros Alliance ang ginalantaw nga magasuporta kay Vice-Governor Jeffrey Ferrer.
Samtang, ang mga NPC members nga indi naman kabahin sang magka-alyado nga local political groups ang ginalauman nga magasuporta kay Engr. Lea Delfinado, nga amo ang opisyal nga kandidato sang ila partido.
Suno kay Governor Lacson, ginakilala sang national office sang NPC ang merger sang Love Negros kag UNEGA humalin pa man sadtong 2019. Samtang, wala naman sang commitment ang NPC sa congressional race sa Quinto Distrito sa tunga nanday Incumbent Congressman Dino Yulo kag Board Member Anton Occeno.
