Narekober ang ₱960,980 nga balor sang peke kag smuggled nga sigarilyo sa Bago Public Market, Prk. Malipayon, Brgy Makiling sa ciudad sang Sagay, pasado las-10 sang aga, adlaw sang Sabado, Oktubre 12.
Natigayon nga maaresto ang mag-utod nga nanday Nasif Amer, 25-anyos, kag Sadik Amer, 21-anyos, kag residente sang Prk. Gardenia, Brgy Balintawak sa ciudad sang Escalante, samtang nakapalagyo naman nanday alias “Ben”, “Ricky”, kag “Panta” sa ginpatigayon nga operasyon.
Base sa rekord sang Bacolod City Maritime Police Station, narekober sa duha ka mga arestado ang 118 ka reams kag 91 ka packs sang nagakalain-lain nga klase sang sigarilyo, kag narekober man sa duha ang isa ka motorsiklo.
Samtang narekober ang 1,344 ka reams kag 81 ka packs ka mga sigarilyo sa lugar nga ginapatihan gin-abandonar sang tatlo ka mga nagpalagyo nga mga suspetsado.
Magapangatubang ang mga suspetsado sang kaso nga paglapas sa Republic Act 10863 ukon Customs Modernization and Tariff Act (CMTA), Sections 145, 255, 263, kag 275 sang National Internal Revenue Code Act of 1997, kag Republic Act 8293 ukon Intellectual Property Act.
