Magabalik sang ila operasyon ang mga katapo sang Task Force Spaghetti Wires pagkatapos sang pagsaulog sang Masskara Festival 2024 sa ciudad sang Bacolod. Ini matapos nga nagpatigayon sang meeting ang task force kahapon nga adlaw Oktubre 16 agud preparahan ang ginalauman nga pagbalik sang ila operasyon.
Ini ginpangunahan ni Councilor Pao Sy, Sangguniang Panglungsod Chairperson on Public Works, nga gin-updan sang City Engineer’s Office, Bacolod Traffic Authority
Office, PNP kag Disaster Risk Reduction and Management Office. Ang nasambit nga meeting ang gintambungan man sang mga representative gikan sa nagkalain-lain nga Telecommunication companies.
Natalana nga magatrabaho ang Task Force sa sulod sang apat ka adlaw sa isa ka semana kag unahon ang mga spaghetti wires sa bahin sang downtown area kag Lacson street. Nagpabutyag man ang mga Telcos sang ila padayon nga commitment nga buligan ang lokal nga panguluhan sa pagkay-o sang mga nagasabod nga mga wires sa mga poste sang kuryente sa pila ka bahin sang ciudad.
Madumduman nga nagsugod ang Task Force Spaghetti Wires tinalikdan nga July 16, 2022 matapos ginpirmahan ni Bacolod City Mayor Albee Benitez ang Executive Order No. 003 nga nagamandu sang removal, clearing kag reorganizing sang tanan nga mga spaghetti wires sa mga main thoroughfares, sidewalks, streets, roads, allets kag public places sa Bacolod.
