Nagapanawagan sang bulig pinansiyal ang pamilya sang pito ka bulan nga lapsag nga nagtaliwan bangod gina-alegar nalumos sa balde nga may tubig matapos nga mahulog sa katre nga ginatulugan, kahapon sang aga, Lunes, Oktubre 21.
Base sa pahayag ni Alyas Kapid, tiya sang lapsag, sila ang nagapanawagan sang bulig pinansiyal bangod nga gina-alegar indi na covered sang Bacolod City Comprehensive Health Program (BacCHP) ang iya nga hinablos, bangod dead on arrival na ini sang nag-abot sa ospital.
Santo sa paglaragway ni Kapid, nasapwan ang iya nga hinablos nga yara na ini sa sulod sang balde nga nagatuwad, kag sa ila pag-alsa sa bata ini na ang puno sang tubig, nagapanglapsi, kag nagahabok na.
Nahibaluan nga tunga sang balde ang may unod sang tubig nga ginbutang sang iloy kag amay sang bata para preparasyon kun mamus-on ini sa tunga sang kagab-ihon.
Dugang pa sang tiya, bangod nga natulugan na ang amay sang biktima nga nagatrangkaso kag tulog naman ang mag-iloy, nalipatan na nila nga kuhaon ang balde nga nahamtang sa ila nga tiilan.
Kapin las-4 sang aga, gin-padede pa sang iloy ang lapsag kag sila ang nagbalik tulog, apang sa ila pagbugtaw kapin las-6 sang aga, ila na nasapwan ang lapsag. Ila ginkatingalahan nga wala nakahibi ang bata, bangod masami ini nagahibi kun mag-bugtaw sa aga.
Ginpatihan nagkamang ang amo nga lapsag kag nagkabos ang kamot sini sa katre, rason nga nahulog sa balde. Gintingwaan pa nga ma-rescue ang bata, apang gindeklarar nga dead on arrival sa ospital matapos ang amo nga insidente.
