Nagdeklarar sang suspension sang klase ang Bacolod City kag 28 ka mga local government units (LGU) probinsya sang Negros Occidental subong nga adlaw, Oktubre 23, 2024.
Sa Bacolod City, suspendido ang klase halin sa pre-school tubtob senior high school samtang yara na sa desisyon sang mga school administrators ang pag-suspend naman sang klase sa colleges and universities.
Lakip man sa 28 ka mga ciudad kag kabanwahanan nga nag-suspend sang klase subong nga adlaw amo ang E.B. Magalona, Cadiz, Victorias City, Sipalay City, Pontevedra, San Carlos, Cauayan, Calatrava, Pulupandan, Binalbagan, Don Salvador Benedicto, Manapla, Isabela, Toboso, Sagay, Silay kag Himamaylan City.
Wala man sang klase sa Candoni, Valladolid, Murcia, Moises Padilla, Hinigaran, Kabankalan, La Castellana, Ilog kag San Enrique. Ini kasunod sang padayun nga mainulanon nga panahon tuga sang Bagyong Kristine nga nagsulod sa Philippine Area of Responsibility tinalikdan nga Lunes, Oktubre 21.
Padayun naman ang monitoring sang Disaster Risk Reduction and Management Office sang tagsa ka mga kabanwahanan kag ciudad sa ila nga mga areas of responsibilities.
Hugot man nga ginapanugyan kag gina-abisuhan ang publiko nga mag-aligmat kag mangin alerto sa palibot natuhoy sa lakat sang panahon.
