Nagapabilin nga suspendido ang face to face classes sa pila ka mga ciudad kag kabanwahanan sang probinsya sang Negros Occidental subong nga adlaw Oktubre 25, 2024.
Ini sandig sa deklarasyon sang mga tagsa ka mga Lokal nga panumuan angut sa nagapadayun sang mabaskog nga ulan tuga sang Bagyong Kristine.
Sa ciudad sang Bacolod kanselado ang klase halin pre-school tubtob senior high school. Samtang ginatugyan na sa mga school administrators ang desisyon sa pagkanselar sang klase sa colleges and universities.
Samtang sa mga LGUs naman sa guwa sang Bacolod kanselado ang klase sa tanan nga lebel sa pribado kag pampubliko nga eskwelahan. Lakip diri ang EB Magalona, Sipalay, Pontevedra, Cuayan, Pulupandan, Don Salvador, Isabela, Himamaylan, Talisay, Valladolid, Silay, Murcia, Binalbagan, Manapla, Bago, Ilog, La Carlota, Kabankalan, La Castellana Escalante.
Apisar kanselado ang face to face classes, ginapanugyan sa DepEd nga padayunon ang modular modality of learning sa mga estudyante.
Hugot man nga nagahatag sang pagpahanumdom ang mga lokal nga mga pamunuan sang tagsa ka mga banwa kag ciudad sa publiko nga mangin alerto kag mag-aligmat sa lakat sang panahon. Ginapanugyan man ang tagsa ka mga Disaster Risk Reduction and Management Office sa tagsa ka mga LGU nga magpadayun sang ila pag-monitor sa ila tagsa ka mga area of responsibilities.
