Pagasayluhon ang mga flower vendors nga nahamtang sa Bacolod public plaza sa bag-o nga lokasyon matapos nga gin-extend ang pagbukas sang Masskara festival food kiosks. Nangin apektado ang mga flower vendors sa higad sang dalanon sang Bacolod Public Plaza sa pagpasar sang city council sang resolution nga naga-extend sang special permit sa mga stall owners sang MassKara Festival 2024 sa dugang nga apat ka adlaw humalin Oktubre 28 tubtub Oktubre 31, 2024.
Suno kay City Administrador nga si Lucille Gelvolea, may kaangtanan sa ginpalawig nga panahon nga ginhatag para sa mga tag-iya sang mga kiosko sa mga manugbaligya sang bulak sa ciudad.
Apisar kadam-an sini ang nakakuha na sang special permit para sa All Saints Day selling sini nga tuig mahimo nga indi makagamit sang ila kinaandan nga mga lokasyon sa San Juan kag Gonzaga nga kilid sang public plaza. Sa ginpatigayon nga session sang city council gin-aprubahan ang ginarekomendar nga substitute area sang nasambit nga mga flower vendors.
Aprobado nga lugar amo ang yara sa Gonzaga Street-North Portion sang Plazamart Building (halin sa west end pakadto sa east end BDO Bank). Gonzaga Street -sa gwa sang gutter sang Unitop area. Araneta Street -halin sa atubang sang Lopues Araneta pakadto sa atubang sang Thakuz. Gatuslao Street -halin sa dry goods store sa kilid sang Chinky’s pakadto sa shoe store antes ang Bong Bong’s. Gonzaga Street-sang Central Market -gutter sa guwa sang Plaza Gelvolea.
Ginapanugyan man nga dapat may yara sang 2- metros nga gap spacing gikan sa tanan nga mga kanto para sa luwas nga pagliko sang mga salakyan sa mga lugar.
Dugang pa ni Gelvolea, may yara sang 248 ka mga flower vendors sa listahan sa tion sang selebrasyon sang tig-kalalag, kag 105 diri ang nagabaligya sang nagligad nga tuig sa bahin sang public plaza apang bangud sa pagpalawig sang MassKara food kiosks kinahanglan nila nga magsaylo sa nasambit nga mga lokasyon.
Magluwas sa nasambit nga mga lugar, may mga flower vendors naman nga nagabaligya sa mga lugar sa atubangan sang Bacolod North Cemetery(Burgos Cemetery) kag sa Libertad area sa tion sang tig-kalalag. Ang mga vendors ang ginapahanugutan lamang nga makasugod sang ila operasyon kun may ara na sila sang special permit humalin Oktubre 29.
