Igapanagtag sa mga pumuluyo sang ciudad sang Bacolod ang Food vouchers nga nagabalor sang P2.5 milyones, nga ginhatag ni Mayor Albee Benitez agud suportahan ang mga food kiosk nga nahamtang sa palibot sang Public Plaza, Bacolod City Government Center, kag The Upper East.
Ginpahayag sang Sangguniang Panlungsod Chairperson sang Committee on Market nga si Councilor Celia Flor nga sa tion sang pagsinapol upod sa alkalde, iya ginsuhestyon ang paghatag sang food vouchers agud mabuligan ang mga manugbaligya sa mga kiosko samtang makabenepisyo man ang mga pumuluyo sang syudad.
Sa baylo nga magtanyag sang diskwento kun sa diin mga vendors lang ang makabenepisyo, ginpakamaayo ni Benitez nga ipanagtag ang mga food vouchers nga nagabalor sang P200 kada isa sa mga pumuluyo, nga sarang maka-redeem sa mga kiosko.
Dugang pa, daku nga bahin sang P2.5 million ang iga-alokar sa mga kiosko sa plaza agud mabuligan ang mga ini nga makabangon sa kapierdihan bangud sang damlag lang nga maulanon nga panahon.
