Ano pa gid ayhan ang kakulba nga imo mabatyagan kun ikaw nga wala sang ideya magpalupad sang eroplano ang na-obligar nga magmaneho sini?
Kaangay sini ang natabo sa isa ka asawa sa Estados Unidos matapos nga nagka emergency ang iya bana nga piloto.
Ang piloto amo si Eliot Alper, 78, samtang kaupod sini sa isa ka gamay nga eroplano ang iya asawa nga si Yvonne Kinane-Wells, 69.
Nahibaluan nga halin ang mga ini sa Henderson Executive Airport sa Las Vegas kag padulong na kun tani sa Monterey, California.
Tawhay lang una ang pagmaneho ni Eliot sang hinali lang ini nakabatyag sang palanakit sa iya dughan kag didto gin-atake ini sa kurason samtang nagapalupad eroplano
Grabe ang panic ni Yvonne bangud sang natabo sa iya piloto nga bana dugangan pa bangud wala ini nakahibalo kun paano mag manehar eroplano.
Sa ini nga mga tinion nagapaminsar na si Yvonne nga basi mapataya nalang gid sila duha sang iya nga bana.
Apang, nagtinguha ini nga pakalmahon ang iya kaugalingon kag nangisog ini sa flight deck, ginkontak ang air traffic controller, kag ginsunod ang tanan nga ginahambal sini sa radio.
Pila ka minutos ang makaligad, natigayon ang emergency landing sa Bakersfield, California.
Diri nagahulat na ang emergency vehicles tubtob sa maka pondo na gid ang eroplano.
Sang na-secure na ang landing, gilayon nga gindala sa ospital ang iya bana, masubo lang bangud ginbawian na gid gali ini sang kabuhi.
Madamo sa mga netizen ang nagdayaw sa ka-isog nga ginpakita sang Yvonne.
