Ginpahanumdom ni Mayor Raymund Tongson ang mga Himamaylanon nga sundon ang mga guidelines nga gintalana sang city government kag hatagan sang priority ang kaluwasan samtang ginadumdum sini ang mga nagtaliwan nga miyembro sang pamilya sa palaabuton nga weekend.
Suno kay Tongson nga gin-mobilize na sang city government ang ila Undas Technical Working Group nga ginapangunahan sang City Mayor’s Office, City Disaster Risk Reduction and Management (DRRM) Office, PNP Himamaylan City Police Station, kag barangay LGUs.
Pahayag sang alkalde nga sundon ang mga guidelines sa mga ginadumilian nga mga butang kag aktibidad sa sulod sang patyo lakip na ang pagsugal, pagdala sang makahulubog nga ilimnon, armas-luthang kag matalom nga mga butang, sigarilyo kag vape, videoke ukon sound system, pagsunog sang basura, pagtinir sa gab-i, kag ang pagbaligya sa sulod sang patyo.
Ginapahanugutan naman ang pagpanglimpyo, pagpinta ukon pagkay-o sang mga pantyon apang indi dapat ihaboy sa sulod sang patyo ang mga materyales nga ginadala.
Dugang pa sang alkalde nga dapat mag-obserbar sang proper parking ang mga tag-iya sang salakyan sa gindesignar nga mga lugar sa sulod kag gwa sang patyo. Ginpahanumdom man sini ang mga pumuluyo nga magahalin sa ila mga puluy-an nga i-unplug ang ila mga appliances ukon gadgets agud malikawan ang ano man nga indi maayo nga insidente.
Sa pihak nga bahin ang alkalde sa gihapon ang magapadayon sa pag-monitor sang weather advisories kag pag-coordinate DRRM kag barangay officials sa tion nga may mga evacuations angut sa mainulanon nga panahon. Suno kay Mayor Tongson nga ang syudad sang Himamaylan ang isa sa mga LGUs sa probinsya nga hugot nga nagapatuman sang evacuation kag relief operations sa tion sang bagyo.
Apisar nangin proactive ang ciudad agud masiguro ang kaluwasan sang mga pumuluyo sini, pahayag ni Mayor Tongson nga kinahanglan gid ang kooperasyon sang mga Himamaylanon sa tion sang emerhensya.
