Ginbawian sang kabuhi ang 53-anyos nga lalaki matapos ginluthang sang wala pa makilal-an nga mga persona sa Phase 3 Buenavista Subdivision, Brgy Guihalaran, Silay City, Negros Occidental las-8:45 sang aga, Nobyembre 6, 2024. Ginkilala ang biktima nga si Domingo Superficial isa ka taxi company manager kag residente sang Phase 3 Buenavista Subdivision, Brgy Guinhalaran sang nasambit nga ciudad. Base sa inisyal nga imbestigasyon nagapungko ang biktima sa iya electric bike nga naka-park sa guwa sang iya puluy-an sang nag-abot ang duha ka wala makilal-an nga mga persona kag hinali nga ginluthang ang biktima sa bahin sang iya ulo kag nagbiya sa lugar. Gilayon naman nga gindala si Superficial sa City Health sang ciudad apang gindeklarar ini nga dead on arrival. Sa karon ginapatigayon ang hot pursuit operation kag follow-up investigation sang mga katapo sang Silay City Police Station para sa posible nga identity sang mga suspetsado.
