Napulo ka mga barangay sa Bacolod ang ginatuyo nga mapalapad pa ang water accessibility paagi sa rainwater catchment facility project sang Bacolod City Water District (BACIWA).
Ang napulo ka mga barangay nga gina-target para sa proyekto amo Brgy. Tangub, Brgy. Mansilingan, Brgy. Sum-Ag, Brgy. Banago, Brgy. Mandalagan, Brgy. Taculing, Brgy. Vista Alegre, Brgy. Handumanan, Brgy. Singcang-Airport kag Brgy. Felisa. Ginalantaw nga ini ang masuguran sa first quarter sang 2025.
Madumduman nga sang Agosto sini nga tuig, nangin pilot area ang Brgy. Granada para sa rainwater catchment program sang Local Water Utilities Administration (LWUA).
Sa programa sang LWUA nga gintawag “Catch Me I’m Falling”, nagbutang sang one-cubic-meter, rainwater collector tank system sa kilid sang barangay hall sang Granada.
Ang nasambit nga tangke ang magasalod sang ulan sa diin pwede makaangot sang hose ang mga pumuluyo agud makakuha ang mga ini sang tubig.
