Normal lang ang ginatawag nga “selos” sa isa ka relasyon labi na kun tuman mo kapalangga ang imo partner kag kun nagapanugod pa lang kamo, daw ka cute lang lantawon.
Apang kun magdugay na kamo, malipay kapa bala kun halos tanan nga butang selosan sang partner mo? Indi ka bala makuga sina?
Kaangay sini ang natabo sa isa ka couple sa Argentina sa diin selos ang ginhalinan sang isa ka krimen.
Samtang naga HHWW (holding hands while walking) ang 23-anyos nga lalaki nga si Mariano Grinspun kaupod ang iya 32-anyos nga nobya nga si Natacha Palavecino, isa ka babayi ang ila nasugata kag nagbugno kay Mariano.
Ang babayi nga si LC ang schoolmate gali ni Mariano sang una kag nangamusta lang.
Apang, wala nalipay ang nobya ni Mariano sa iya nakita rason nga ginkuha sini sa bag ang iya pirmi ginabalon nga kutsilyo kag gin atake ang babayi.
Natumba si LC kag naigu sang kutsilyo ang iya nga ilok kag maayo lang nalikawan sini ang isa pa kun tani nga buno sang kutsilyo matapos nga gintambagan sila sang isa ka nag-abot nga lalaki.
Apang wala diri natapos ang tanan bangud matapos makaluwas si LC, si Mariano naman ang gin-atake ni Natacha sa diin ginbuno niya ini sa dughan.
Bangud sang buno, ginbawi-an gid sang kabuhi si Mariano.
Base sa imbestigasyon sang otoridad, may history na sang pagka-bayolente si Natacha.
Tuig 2021 sang napreso ini sang isa ka tuig matapos niya man ginbuno sa dughan ang iya ex-boyfriend.
Sa nahibaluan, na report naman sadto ni Mariano si Natacha sa kapulisan bangud sang pagpangastigo sa diin gindagdagan gid ini sang restraining order apang sang nag-expire ini, ginhatagan ni Mariano sang isa ka tyansa si Natacha sa paglaum nga nagbag-o na ini.
