BACOLOD CITY- Padayon nga ginahibalo sang Bacolod City Police Station 2 ang identity sang bangkay sang isa ka lalaki nga nasapwan sa bahin sang sea wall sa BREDCO Port sa Barangay 2 sa ciudad sang Bacolod, gab-i sang Martes, Nobyembre 12.
Ginpahayag ni Bacolod PS2 Commander Police Major Eugene Tolentino, nga padayon ang paglibot sang mga katapo sang kapulisan sa lugar kag mga kaingod nga Barangay agod matumod kag makilala ang biktima.
Madumduman nasapwan ang biktima nga nagasuksok sang itom nga shorts kag nakagapos sang kalat ang iya tiil samtang nakagapos naman ang kamot sang iya bayo kag ginaalegar may pilas sang bala sa likod kag wala na sa duha ka dulonggan nga posible ginlihapan sang suspetsado.
Santo sa pagpangusisa sang kapulisan sa lawas sang biktima, wala ini sang tattoo ukon birthmark, apang may tinahian ini sa bahin sang iya tiyan.
Wala naman CCTV camera malapit sa lugar agod kuntani makabulig sa imbestigasyon sang kapulisan.
