Ginahulat ang nagakaigo nga desisyon para sa driver sang pick up nga nakabunggo-patay sa mag-asawa sa National Highway, Purok Violetas, Barangay Balingasag, Bago City las-5:35 sang aga, Nobyembre 13, 2024.
Ang mag-asawa nga biktima ang ginkilala sanday Alex Ortega, 60-anyos kag ang 65-anyos nga si Cecilia Ortega pareho nga residente sang nasambit nga lugar. Samtang ang driver naman sang pick-up ang 38-anyos nga si Cornelio Villaester Jr. nga residente sang Hacienda San Jose, Barangay Mabini, Cadiz City.
Base sa impormasyon nagabiyahe ang pick-up nga ginamaneho ni Villaester gikan Bacolod kag padulong ini sa ciudad sang Bago.
Nagalabay ini sa inner lane sang highway apang bangud sang madasig nga pagpadalagan nalab-ot sini ang Mio nga motorsiklo nga ginasakyan sang mag-asawa nga ginamaneho ni Alex upod ang backrider sini nga iya asawa nga si Cecilia nga magatabok kuntani gikan sa nasidlangan nga bahin sang dalan.
Bangud sini nakaangkon sang serious injuries ang mag-asawa nga gilayon naman nga gindala sang Bago City Rescue Team sa Bago City Hospital para sa medical treatment apang pareho ang mga ini nga gindeklarar nga dead on arrival. Sa karon yara na kustodiya sang Bago City PNP ang pick-up driver nga si Villaester para sa nagakaigo nga disposisyon.
