Sa panahon karon, halos tanan nga impormasyon makita ta na pinaagi sa pag browse sa social media.
Kag kun may gina-endorse gani nga produkto ang aton mga social media idols, daw sundon ta man. Kun mayo sila magpapati, daw atong mapadala-dala ka man.
Pasensya na sa mga nagakaon dira.
Isa ka sikat nga streamer ukon social media influencer nga si Kong Yufeng ang nagkaon sang feeds ka baboy sa atubang camera bilang kabahin sang isa ka challenge sa diin kinahanglan sini mabuhi pinaagi sa pag consume sang pinakabarato pagkaon nga iya makita sa sulod balay.
Samtang naga-live broadcast ini, ginpahayag ni Yufeng nga nag-research siya sang budget-friendly tips sa diin iya man ini gin-share sa iya fans. Nakita sini nga isa sa dabest nga option ang pagkaon sang feeds ka baboy.
Ang isa ka sako sini ang nagabalor sang 100 yuan ukon P821 lang.
Ginaalegar sini nga manggaranon sa protina ang feeds, indi dasig makapatambok kag mas healthy kun ipaanggid sa pagkaon ka tawo.
Agud pamatud-an ang ini nga pagpati, nagkaon pa ini sang feeds samtang naga live.
Dugang pa sini may natural nga ingridiente ang feeds kaangay sang soybeans, peanuts, sesame, corn, kag added vitamins.
Daw kaangay lang nga naga-food review ini, rason kun ngaa madamo man sang nagpakamalaot sang iya content.
Suno sa mga viewers sini, syado ka trying hard ang content creator kag indi ini dapat pagsuportahan bangud sang pag promote sini sang pagkaon nga wala man dapat ginakaon sang tawo.
Pamangkot sang kadam-an “Paano mangin safe para sa tawo ang pagkaon nga gin ubra para sa mga sapat?”
May pila ka grupo man ang nagaduso nga i-report ang account ni Yufeng bangud sa indi dapat sulundon nga content sini.
