Nagahulat karon ang City Government sang Bacolod sang approval sang Development Bank of the Philippines (DBP) para sa bag-o nga terms and conditions sang realigned P525 million budget para kuntani sa rehabilitasyon sang Burgos Public Market.
Suno kay Councilor Thaddy Sayson, chairperson sang committee on appropriation and finance, naka-aprubar na sila sang resolusyon para sa pagkanselar sang P525 million nga ginpa-in para sa improvement kag rehabilitation sang merkado gikan sa P4.1 bilyon nga kabug-usan nga loan gikan sa DBP.
Dugang pa sang konsehal nga gin-aprubahan man sang ciudad ang authorization’s request ni Mayor Albee Benitez nga mag-apply liwat sang P525 million nga grant sa idalum sang bag-o nga terms and conditions kag para sa iban pa nga katuyuan.
Ginpahayag si Sayson nga para ini sa realignment sang isa sa mga items sang loan sang syudad kag wala nag-apply sang isa pa ka loan ang Bacolod City.
Madumduman nga ang P525 million ang para sa rehabilitasyon sang Burgos Public Market apang bangud mayoriya sang mga vendors ang nagpamatok sa amo nga proyekto, gin-realign sang ciudad ang budget para sa iban pa nga proyekto.
Una na ginpahayag ni Mayor Benitez nga iga-realign ang budget para sa pagtapos sang legislative building, Old City Hall, City Health Office, tree park sa Barangay Alangilan kag para sa pagtukod sang animal shelter sa Barangay Granada.
