Gin-abswelto sang korte ang gintawag “Himamaylan 7” sa kaso nga murder kag frustrated murder. Ang desiyon sang korte ang gindeklarar ni Judge Rodney Magbanua Regional Trial Court Branch 61 sa Kabankalan City, Negros Occidental kahapon nga adlaw, Nobyembre 18, 2024.
Ginkilala ang mga akusado nga sanday Pastor Jimie Teves, Jodito Montesino, Jaypee Romano, Jasper Aguyong, Rogen Sabanal, Eliseo Andres, kag Rodrigo Medez lunsay residente sang Barangay Buenavista sa ciudad sang Himamaylan nga napriso humalin pa sang Mayo 2019.
Suno kay Judge Magbanua ang mga akusasyon kulang sa bastante nga ebidensya agud pamatud-an ang sala sang mga akusado.
Madumduman nga natabo ang insidente angut sa pagkapriso sang 7 ka mga akusado sadtong Mayo 12, 2018 sa makamamatay nga ambush sa bahin sang Village Tan-awan nga boundary sang ciudad sang Kabankalan kag Himamaylan sa diin duha ka soldado ang napatay, kag pito pa ang napilasan sa isa ka ambush nga ginhimo batok sa mga tropa gikan sa ika-62 sang Army Infantry Battalion.
Ang mga suldado nga napatay sa insidente amo sanday Private first class Vicente Marcon kag Sandy Arevalo. Kasunod sini, gintudlo sang militar ang mga akusado, nga gin-tag sila nga mga katapo sang New People’s Army (NPA) nga ginaalegar nadalahig sa pag-atake.
Ang una nga report sang militar nahanungod sa insidente una nga nagsiling nga ang mga naghimo sini ang wala pa makilala apang pila ka bulan ang nagligad, ang mga ngalan sang “Himamaylan 7” ang natigayon nga nagwa.
